說明 | hkhisfig

一如首頁所講，本圖鑑源於敝專頁《100個香港歷史帶路人》計劃，原意係用一百字快速簡介唔同香港歷史人物，並著重透過佢地「帶路」，引領讀者接觸一段段唔同嘅香港歷史，因此當中嘅人物甚至唔一定親身踏足過香港。
另外喺描繪呢啲人物方面，《帶路人》盡量參照歷史記載，同時加入戲劇性表達效果，並往往刻意描繪成同人物流傳形象相異嘅年紀，以增加讀者想像空間。當然喺AI取代人類作畫嘅前夕，呢啲努力嘅價值連我本人都有一定質疑。
至於缺乏相片或者畫像記載參照嘅人物，計劃原定係喺眼部留低陰影以作區分，但喺呢個圖鑑日後將會逐漸補完眼睛部份，並改為註明缺乏參照。

本圖鑑能力評價純屬玩票性質，旨在喺過一過歷史宅嘅乾癮，歡迎來函討論，但請毋須嚴肅看待。

各項能力判斷考量不一，但都遵循兩個前提：

1. 盡量以個別表現為優先考量，不過嗰個人物嘅身份同經歷自然亦有所影響；

2. 評價係同當代人比較所得，否則近代人物知識同體質自然優勝過遠古人物。

因為香港歷史記載罕有提及個別人物嘅肉搏能力，因此亦同時考量佢指揮旗下部隊戰鬥嘅能力。呢點簡單講就係遊戲＜三國志＞嘅武力加上統率。

好似杯渡禪師呢種可以孤身遊歷嘅人即使未必有領軍經驗，但都可以判斷佢個人嘅肉搏能力唔應該太差。

管理以及領導部下執行計劃嘅能力。呢點比較考量行政或者業務方面，因此如果嗰個人物本人喺呢啲事務上表現出色亦會提高評價，畢竟會提及嘅人物十居其九會有自己團隊。
好似盧亞貴呢種富商，可以判斷佢有一定統馭部下嘅能力。

判斷大局，以及制定策略嘅能力。呢點考量包括但唔限於政治同商業上嗰個人物嘅判斷，以及應對措施嘅執行。
好似羅旭龢屢次籌劃平息社會紛爭嘅策略，可以判斷佢擅長釐清同引導局勢。

受人歡迎同信服嘅能力。呢點集中但唔完全以當代人表現為考量，另外例如嗰個人物有無辦法說服人參與佢一啲利益唔明確嘅計劃，亦係考量之一。
好似關景良嘅剪髮不易服提倡效果一般，可以判斷佢喺號召上嘅表現有一定疑慮。

個別範疇同專長嘅能力。呢點包括但唔限於學術、技藝或者創作等範疇，亦會考量相關能力嘅罕有程度。
好似張亞霖嘅麵包舖壟斷全港市場，可以判斷佢喺呢方面嘅技藝表現良好。